Kareem Adawy's Reviews > الأساطير اليونانية والرومانية

خلصت الكتاب وعايز أحكيلكم عن لغز نشأة الاساطير عموما، لو قريت من بعيد كده عن الاساطير اليونانية وبعدين جيت قريت من بعيد برده اساطير الفراعنة وبابل والسومريين، وبعدين قبل ما تنام بصيت على الاساطير الدينية وقصص الانبياء في الكتب السماوية التلاتة، هتلاحظ أن نسبة التشابه بين كل دول أكتر من حوالي 70% بحالهم!

وعشان تفسر ده قدامك افتراض من الاتنين، الافتراض الاول إنهم قلدوا بعض وكل حضارة كانت بتتبني على اكتاف/ انقاض اللي قبلها، وده حصل فعلا لكن في نفس الوقت فيه حضارات كانت منعزلة ومنغلقة ومش بيطلعوا من البيت ومع ذلك نسبة التشابه بينهم وبين التانيين هي هي + إن الكتب السماوية المفروض نازلة من السما، فمش معقول إنها تكون قبل ما تنزل شافت الاساطير بتقول ايه وعملت سيناريوهات تقليد ليها يعني، مش منطقي خالص.

الافتراض التاني بقى هو اللي اكتشفه عالم النفس عمو كارل يونج، وقال إن العقل الباطن للانسان فيه جزء منه اسمه العقل الجمعي، بيتنقل مع الجينات بالظبط على مدار الاجيال، يعني مثلا مش كل البشر كانوا عايشين في مكان فيه تعابين، فعشان سيادتك اللي لسه مولود ومشوفتش تعبان في حياتك انت ولا ابوك ولا جدك، لما تروح مكان فيه تعبان الفضول هياكلك وهتروح تشوف ايه ده وممكن تتفزلك وتبوسه وتموت، فعشان المأساة دي محصلش جدك رقم 120 تطوع ونقل في جيناتك خوفك الفطري من التعابين حتى لو عمرك ما شوفتهم في حياتك ولا تعرف إيه دول.

وطبعا لما تعرف إنك عشان تفضل عايش لحد دلوقتي فده معناه إنك حفيد نسل استمر ونجى لمدة 3 مليار سنة تقريبًا، فده قدر ينقلك كل مخاوفهم ونزعاتهم عشان متجيش يا إنسان يا صغنن تروح تحط ايدك على النار عشان تشوف بتلسع ولا لأ.

حوار التعابين ده اكتشفه بدقة عمو داروين، داروين راح لمتحف تعابين وفضل واقف قدام تعبان محطوط في صندوق زجاجي، كل شوية داروين يقرب وشه من الزجاج واول ما التعبان يفتح بقه داروين يلاقي وشه بيرجع لورا غصب عنه، عاد التجربة كذا مرة ومفيش فايدة، برده دماغه بترجع لورا بالرغم من إن فيه زجاج قدام التعبان ومستحيل مستحيل يؤذي داروين .. وطبعا عشان رد الفعل ده مغروس في جينات الإنسان من مليارات السنين، مهما حصل مش بيتغير ولو اتغير هيحتاج كام مليار سنة كمان.

إيه علاقة ده بالاساطير بقى؟ كارل يونج قال إن العقل الباطن بتاعنا فيه حاجة اسمها archetypes، ودي أنماط اتطورت في عقولنا آلاف السنين، أنماط عن الآلهة، الدين، العلاقات، الأسرة، الحب، الصداقة وهكذا، وإن لو أي حد قعد دلوقتي حالا عشان يألف قصة من دماغه، غصب عنه هنلاقيه بينفذ الانماط دي بالحرف من غير ما ياخد باله وممكن كمان يكون مسمعش عنهم قبل كده .. وده اللي حصل بالظبط مع مؤلفين الأساطير دي، وكذلك لما الأديان جات تخاطب البشر، خاطبتهم حسب الانماط اللي في دماغهم دي عشان يفهموها ويستوعبوها بسهولة.

وأخيرًا: الاساطير جميلة اوي، وعمو امين سلامة حكاها في الكتاب ببساطة ومن غير فزلكة ولا شغل الدروس المستفادة بتاع دروس القراءة في ابتدائي ده. أينعم ممكن تتوه شوية في الاول لكن بعد كده هتتكيف على الآخر .. إنچووووي:))