حبيبة 's Reviews > جوابات حراجي القط

الجهل مريح يا فاطنة
الجهل مريح
عدم العلم مليح
يا أم ولادي يا إنسانة زي الناس
عدم العلم مليح
عدم العلم عيون تنعس في الليل
ضحكة من القلب
من القلب صحيح
عدم المعرفة بيخلي الرجالة عيال
يضحكوا يبكوا
ودايمًا للدنيا طعم جديد

أنا أكتر واحدة في الدنيا تعز حراجي..
هو حراجي عاوز إيه م الدنيا
غير إن الضحكة لما تطلع من قلبه تطلع مرتاحة؟
وأنا على قد ما بقدر
بدعيلك..
بكشف شعري للنجم وبدعيلك يا حراجي
وأقول
متى حتاجي؟
وأشوفك بعينيا
وأنت بتخطي عتبة الدار؟

أما عن نفسي.. فأنا لا بخيل ولا شي..
كيف اللي في قلبي بس يا ناس
أرويه في جواب؟

مشتاق ليكي
شوق الأرض لبل الريق
شوق الزعلان للنسمة
لما الصدر يضيق
مشتاق..

شهرين يا بخيل!
ستين شمس وستين ليل
والنبي يا حراجي أما أطول قلبك
لاقطع بسناني الحتة القاسية فيه

قولي يا فاطنة للي بنقولُّه وللي مابنقلُّوش
الدنيا مش عيش بس ولا قروش
ولا غُطيان وفروش
قولي يا فاطنة للكل
إن احنا كنا هُبل
وضيعنا العمر فاشوش..

وتطلي في عين الواحد..
يا ولداااه ع الغربة
عارفة يا مرتي الراجل في الغربة يشبه إيه؟
عود درة وحداني
في غيط كمون..

لكنّ حراجي أبو ضحكة ترج النجم
مات مني يا فاطنة
وبقيت دلوقتي حراجي تاني حزين

الورقة خلصت يا أم عزيزة.. وقلبي مليان.