Radwa's Reviews > أهلا بك في بيت القرود

التجربة الثانية لكورت فونيجت، وبرضة بترجمة محمد أحمد جمال. والمرة دي مجموعة قصصية. القصص تنوعت بين الاجتماعي والساخر والديستوبي (ولو أني كنت أفضل لو كانت القصص الديستوبية أو الخيالية أكتر من كده) بس أعتقد أنها كشفت كتير عن أسلوب كورت فونيجت، مع أني حساة فيها باختلاف كبير عن الرواية التانية الوحيدة اللي قرأتها له. تجربة ممتعة وقراءة قصة أو قصتين كل يوم من المجموعة كان ممتع من دون شك

ريفيو بسيط لكل قصة:
1- حيث أعيش:
استعراض لبلدة أمريكية صغيرة ببعض التهكم والسخرية، حسيت أن المقدمة أظرف وأخف دما من القصة دي. بداية عادية أوي للمجموعة.

2- هاريسون بيرجيرون:
ديستوبيا عظيمة وتقديم جديد لفكرة الأخ الأكبر ولعب على فكرة الرقابة وتشويش الشبكات. محزنة كأي ديستوبيا ولم تخل برضة من الكومييدا السوداوية

3- من أنا هذه المرة؟:
متوقعتش قصة رومانسية رقيقة ولطيفة في سياق بلدة صغيرة وتمثيل مسرحي وشخصيات حبوبة.

4- أهلا بك في بيت القرود:
عاجبني التنظيم المرتب-العشوائي للمجموعة دي. قصة لطيفة عن بلدة صغيرة وبعدها قصة ديستوبية مرعبة. يا ترى ده هيفضل مستمر طول الكتاب؟ طبعا الديستوبية المرة دي كانت عن زيادة التعداد السكاني و"طرق" مواجهة المشكلة دي. القصة دي كانت شديدة شوية وانتهاك مش بحب أقراه بس مقرأتش كتابات كتيرة عن تنظيم النسل فكانت مختلفة. بتفكرني بسلسلة روايات حديثة نوعا ما للشباب اسمها
Arc of a Scythe

5- تمشية طالت إلى الأبد:
ايه القصة العسولة الرقيقة دي؟

6- ملف فوستر:
جملة "أبيع النصيحة للأثرياء" اللي بتبدأ بيها القصة لسبب ما عجبتني جدا جدا. بسبب طريقة الكتاب في أول 4 قصص، كنت متوقع قصة ديستوبية، بس لقيتها قصة اجتماعية برضة عن راجل بيساعد أصحاب الأموال على استثمار فلوسهم عشان يكسبوا منها وبتقابله حالة عجيبة في شخص معاه أصول غالية بس مش عايز يبيعها لسبب يجهله، وبنشوف رحلته في فهم الشخص ده.

7- الآنسة فتنة:
قصة اجتماعية عن جندي عائد من الحرب (تاني قصة عن جندي شاب أفتكر حتى الآن؟) والممثلة الشابة في البلدة وفتنتها والتوتر اللي بينهم. مكانتش أفضل قصة

8- كل أحصنة الملك:
قصة أخرى عن جنود، وده فعلا فعلا أقل الأنواع تفضيلا في القصص عندي. بس رغم كده فهي قصة شيقة، مباراة شطرنج والخسارة معناها الموت وقطع الشطرنج هم بشر. مش هنكر أنها خلتتني متوترة لحد الآخر، مع أني كنت عايزة خاتمة أكثر قسوة

9- كلب توم أديسون الأشعث:
مش محتاجة قصة تقنعني أن الكلاب أذكى من البشر، أنا متأكدة من ده، بس ظريفة يا فونيجت.

10- قاموس جديد:
أعتقد اللي هيقعد يتابع الإصدارات المختلفة من القواميس لكل سنة وويكتشف ايه الكلمات الجديدة اللي بتضاف في كل إصدار هيكتشف كتير، وخصوصا أن دلوقتي القواميس بتضيف الكلمات - في أحيان كتيرة - معتمدة على شيوع استخدامها في المحادثات اليومية والعامية نوعا ما.

11- الجيران:
كنت أتمنى نهاية سوداوية أكتر للقصة دي لأنها قائمة على سوء فهم مثالي في القصص الي زي دي، وخصوصا أنها من وجهة نظر طفل ومأزعجتنيش جدا زي قصص تانية بتبقى من وجهة نظر أطفال، وطبعا فكرة التلصص على الجيران والتدخل في حيواتهم عمرها ما بتقدم.

12- قصور أكثر فخامة:
بطلة القصة المغيبة عن الواقع فكرتني جدا بديزي من قصة "غاتسبي العظيم". بس مش هنكر أن نهاية القصة صادمة وضافت بعد جديد للحزن اللي في القصة دي. أقدر أقول إنها من قصصي المفضلة في المجموعة حتى وإن كانت خالية تماما من أي عنصر خيالي.

13- حكاية هاينيس بورت:
السياسة بتطغى على القصص دي، وساعات بتكون عابرة، بس في قصص زي دي، بيبقى لو الشخص مش فاهم السياق السياسي للفترة دي أوي فمش هيطلع منها بحاجات كتيرة وخصوصا لو كل الأسامي المذكورة لا تعني له شيء، بس كانت ظريفة

14- مياه أكثر مما رأيت في حياتك:
قصة محزنة عن الحرب والأيتام اللي بتسيبهم، وتمنيت لو كانت القصة كلها من وجهة نظر أطفال أيتام بدلا من تاني إدخال الجنود في الموضوع زي أغلب قصص المجموعة. وبرضة خاب أملي لقلة القصص الديستوبية في المجموعة دي.

15- تقرير عن تأثير بارنهاوس:
قصة عن السلام والقوة الذهنية واللي مكن تعمله وازاي ممكن حد يستغلها. لطيفة

16- سؤال اليوفوريا:
نظرة ديستوبية سوداوية عن سؤال ايه اللي هيحصل لو الناس تقدر تتحكم بالسعادة وتبيعها وتخلي الناس تدمنها زي المخدرات؟ فكرتها حلوة

17- عد إلى زوجتك وابنك الغاليين:
ماشي، تمام. معنديش تعليق على القصة دي حقيقي غير أن الرجال أوغاد يا ربي.

18- غزال في الورش:
يعني ايه؟ يعني ايه؟ هرب للغابة ورا الغزال وساب حياة التمدن مثلا ولاقاها مش ماشية على ذوقه؟ حسيت أني كنت بقرأ قصة شبه أليس في بلاد العجائب بس واقعية تماما

19- الكذبة:
قصة ادتني شعور "غيلمور غيرلز" شوية في شخصياتها وأحداثها. عن ولد مع عيلته الغنية اللي أسهمت في تأسيس مدرسة قديمة والكذبة اللي الولد مخبيها عن أهله

20- غير جاهز للبس:
قصة ظريفة خيالية عن أشخاص قدروا يخرجوا من أجسادهم ويدخلوا أي أجساد يحبوها في أي وقت.

21- الفتى الذي غلب معه الجميع:
قصة لا بأس بيها عن أستاذ موسيقى وولد متمرد وازاي أنه بيساعده يلاقي هدف في الحياة، قصة اتهرست مية مرة قبل كده بس ملقيتش فيها حاجة جديدة هنا.

22- صواريخ ورجال:
قصة تانية جميلة جدا، عن أبوين لعالمين فضاء، واحد من روسيا والتاني من أمريكا، وبيبعتوا خطابات لبعض بعض موت أولادهم في الفضاء. غيها تساؤلات عن الفرق بين حب الفضاء والاستكشاف والعلم واستغلال الحكومات للشباب المتحمس لتحقيق أجنداتهم الخاصة. تاني، مفيهاش جديد، بس عجبني أسلوبه جدا.

23- إبيكاك:
أوه يا إبيكاك المسكين! أنا خلاصت وصلت لمرحلة الإشفاق على الآلات من البشر

24- آدم:
نظرة حلوة لاختلاف منظور الناس لمولود جديد ما بين غير المبالي وما بين المنبهر تماما. مش فاهمة علاقة اسم القصة واسم "آدم" نفسه بالموضوع

25- غدا وغدا وغدا:
ونختم المجموعة بديستوبية بائسة. وحبيت اكوميديا السوداوية في العالم ده واللي هو تاني عالم ديستوبي فونيجت بيحبه، عن بشر قدروا يتجاوزا الشيخوخة والموت والتكدس السكاني وأثره في عائلة من عائلات الكوكب المتكدس.