Muhammad Samir's Reviews > ويسترن يونيون فرع الهرم

بدايةً: فرحان اني كان عندي حق لما قولت في ريفيو عن ديوان المانيفستو..
إن مصطفى إبراهيم، هو شاعر جيلنا وثورتنا.. ديوان ويسترن يونيون فرع الهرم أثبتلي كده، وحسّيت معاه بكل كلمة قالها.. ساعتها تجلّى كلام الشاعر نجيب سرور قدامي لما قال: الشِعر مش بس شِعر لو كان مقفّى وفصيح.. الشِعر لو هزّ قلبك وقلبى، شِعر بصحيح، وشِعر مصطفى إبراهيم كله بالعاميّة، مش بالفُصحى. بس كلامه بيلمس القلب بطريقة كأنه بيلعب على أوتار الوجع. وعشان كده، هو شِعر بصحيح.

مصطفى بدأ ديوانه تقريباً بـ 32 إهداء، منهم إهداء لفيلم الكيت كات، وموسيقى الفيلم للموسيقار راجح داوود، ودي حاجة أسعدتني شخصياً لإني كنت دايماً وانا صغيّر كنت بحب أروح أقعد كتير مع نفسي ف السيما وأتفرج عليه، ومش بزهق منه لو اتفرجت عليه ألف مرة لإني بعشقه.

حسّيت مع قصيدة تايه في الزحام بوجع الإجابة والغياب، عن مين فينا اللي عارفك يارب!



وف قصيدة ع الغارب لما بيتكلم مع ربنا بكل بساطة:

يارب، ياللي سايبلي الحبل ع الغارب.
انا غرقان بدون قارب، وماعرفتش أعوم وحدي.
وكل ما أمدّلك يدّي، وتنشلني..
وأعوم شبرين.. إيديّا يفلفصوا الإتنين..
وأقولّك سيبلي انا الباقي.. تسيبلي الحبل ع الغارب..
تخش الميّة حلقي أشرق، ف أصرخلك. وأقول بغرق..
وأقولّك عمري ما حسيبك، ف تنشلني، أعوم شبرين
إيديّا يفلفصوا الإتنين.. وأسيب إيدك..



وف قصيدة القلب القماش اللي ليها ذكرى حلوة معايا، وبيغنّيها محمد محسن في ألبومه اللفّ ف شوارعك في أغنية بعنوان الكوتشي اللي باش:
https://soundcloud.com/danosediq/w2wd...

وف قصيدة دفتر أسامي الهاموش، كل المُهمّشين ف مجتمعنا والناس نسياهم، من أول دفعة كشك الحراسة وجندي المراسلة لحد عامل النظافة وكل اللي ماتوا ف آخر الطابور.. وفرقة ليل وعين عملتها أغنية بنفس اسم القصيدة:
https://soundcloud.com/lelwaayen/trac...

ومعنى الوجع في قصيدة قصيرة بعنوان: عم محمد.



والدم بقى سِمة نسل آدم من بعد قصة هابيل وقابيل، يا ترى لو كان قابيل ما قتلش أخوه هابيل، مكناش هنشوف الحزن والدم كل يوم! بس كلنا للأسف دوقنا طعم الحياة في قصيدة: خدّ الحياة.



وف قصيدة شيء يشبه سلك السمّاعة لما تفتكر إننا كلنا بالصلاة ع الزين موجودين على كورة لعينة بتلف وتدور، ومكاننا أصلاً فوق في الجنة، بس احنا مش فوق.. احنا قاعدين هنا كلنا بنسدد قطمة تفاحة! الألم اللي من غير نهاية. القصيدة بصوت وإلقاء: مصطفى إبراهيم.
https://www.youtube.com/watch?v=KlcpB...



وف قصيدة: مفِهاش حاجات ببلاش.



في نهاية العرض اللي كتبته ده، أحب أقول: اكتب براحتك، شِعر على القافية وبالفُصحى، بس لو ما أثّرش في الناس، يبقى انت ماعرفتش تلمس قلوب الناس.. وزي ما قال عمنا نجيب سرور تاني مرة: الشِعر مش بس شِعر لو كان مقفّى وفصيح.. الشِعر لو هزّ قلبك وقلبى، شِعر بصحيح.

مصطفى إبراهيم هو أيقونتي الجديدة في حياتي بالنسبة للشِعر، لإنه بجد عرف يلمس قلبي وعرف يلمس قلوب الناس بكلامه، وطبعاته كل مُستنفدة أول بأول بسم الله ما شاء الله، مصطفى يمكن طبّق كلام الملك محمد منير في أغنية من أغانيه لما قال: دوّر ع الناس، ف قلوب الناس :)